Jer 22 | NdeIBE | STEP | Nanku akutshoyo uJehova: “Hamba wehlele endlini yenkosi yakoJuda umemezele khona ilizwi leli uthi,

Jeremiah 22

Ukwahlulelwa Kwamakhosi Angalunganga

1 Nanku akutshoyo uJehova: “Hamba wehlele endlini yenkosi yakoJuda umemezele khona ilizwi leli uthi, 2 ‘Zwana ilizwi likaJehova, we nkosi yakoJuda, wena ohlala esihlalweni sobukhosi sikaDavida – wena, izikhulu zakho kanye labantu bakho abangena ngamasango la. 3 UJehova uthi: Yenzani okulungileyo lokuqondileyo. Mhlenge esandleni somcindezeli wakhe lowo ophangiweyo. Lingenzi okubi loba udlakela kowezizweni, intandane loba umfelokazi, njalo lingachithi igazi elingelacala kule indawo. 4 Ngoba uma linanzelela ukulandela imilayo le, amakhosi ahlala esihlalweni sobukhosi sikaDavida azangena ngamasango ale indawo, egade izinqola zempi lamabhiza, elezikhulu zawo kanye labantu bawo. 5 Kodwa uma imilayo le lingayilaleli, kutsho uJehova, ngifunga ngami ukuthi indawo le izakuba lunxiwa.’ ”

6 Ngoba mayelana lendawo yenkosi yakoJuda uJehova uthi: “Lanxa unjengeGileyadi kimi, lanjengengqongo yeLebhanoni, ngeqiniso ngizakwenza ufane lenkangala, lanjengamadolobho angahlali muntu.

7 Ngizakuthumela abachithi, indoda nganye ilezikhali zayo, njalo bazaquma imijabo yenu emihle yemisedari bayiphosele emlilweni.

8 “Abantu abavela ezizweni ezinengi bazadlula kulelidolobho babuzane besithi, ‘Kungani uJehova enze into enje kulelidolobho elikhulu na?’ 9 Impendulo izakuthi: ‘Ngoba basidelile isivumelwano sikaJehova uNkulunkulu wabo bakhonza abanye onkulunkulu njalo babasebenzela.’ ”

10 Lingayikhaleli inkosi efileyo loba lililele ukulilahlekela kwayo; kodwa, khalelani kakhulu othunjiweyo, ngoba kasayikubuya njalo loba abone ilizwe lakibo futhi.

11 Ngoba mayelana loShalumi indodana kaJosiya, owangena esikhundleni sikayise esiba yinkosi yakoJuda kodwa osesukile kule indawo: uJehova uthi, “Kasoze abuye futhi. 12 Uzafela kuleyondawo asiwa kuyo ethunjiwe; ilizwe leli kasoze alibone futhi.”

13 “Maye kuye owakha indlu yakhe yobukhosi ngokungalungi, lezindlu zakhe zangaphezulu ngokungafanelanga, esenza abantu bakibo basebenzele ize, engabaholisi lutho ngokusebenza kwabo.

14 Uthi, ‘Ngizazakhela indlu enkulu yobukhosi elezindlu zangaphezulu ezibanzi.’ Ngakho uyenza ibe lamawindi amakhulu, ayinameke imisedari ayicombe ngokubomvu.

15 “Ukuba lemisedari eminenginengi kukwenza ube yinkosi na? Uyihlo kazange abe lokudla lokunathwayo na? Wenza okuqondileyo lokulungileyo, ngakho konke kwamlungela.

16 Wavikela amalungelo abayanga labaswelayo, ngakho konke kwamlungela. Lokho akusikho okutsho ukungazi na?” kutsho uJehova.

17 “Kodwa amehlo akho lenhliziyo yakho kukhangele inzuzo yenkohliso, lokuchitha igazi elingelacala, ukucindezela kanye lodlakela.”

18 Ngakho mayelana loJehoyakhimi indodana kaJosiya, inkosi yakoJuda, uJehova uthi: “Kabayikumkhalela besithi: ‘Maye ngomfowethu! Maye ngodadewethu!’ Kabayikumkhalela besithi: ‘Maye ngenkosi yami! Maye ngobuhle bayo obukhulu!”

19 Uzangcwatshwa njengobabhemi – ahudulwe aphoselwe ngaphandle kwamasango aseJerusalema.”

20 “Qansa uye eLebhanoni umemeze, wenze ilizwi lakho lizwakale eBhashani; memeza use-Abharimi, ngoba bonke abamanyane lawe banqotshiwe.

21 Ngakuxwayisa uzibona uvikelekile, kodwa wena wathi, ‘Angiyikulalela!’ Le ibe iyindlela yakho kusukela ebutsheni bakho; kawungilalelanga.

22 Umoya uzabaxotshela khatshana bonke abelusi bakho, labamanyene lawe bazathunjwa. Lapho-ke uzayangeka ube lenhloni ngenxa yobubi bakho bonke.

23 Lina abahlala eLebhanoni, eligcineke kuhle ezindlini zemisedari, lizabubula kakhulu lapho izinhlungu zilehlela, ubuhlungu obunjengowesifazana ehelelwa!

24 “Ngeqiniso elinjengoba ngikhona,” kutsho uJehova, “lanxa ngabe wena, Jehoyakhini ndodana kaJehoyakhimi inkosi yakoJuda, wawuyindandatho ebukekayo esandleni sami sokunene, ngangizakukhupha. 25 Ngizakunikela kulabo abafuna ukukubulala, labo obesabayo – kuNebhukhadinezari inkosi yaseBhabhiloni lakumaKhaledi. 26 Wena kanye lonyoko owakuzalayo ngizaliphosela kwelinye ilizwe, lapho elingazalelwanga khona, lapho elizafela khona bubili benu. 27 Kaliyikuphinda libuye elizweni elifisa ukuza kulo.”

28 Umuntu lo, uJehoyakhini, uyimbiza efileyo, edelelwayo, into engafunwa muntu na? Kungani yena labantwabakhe bezaphoselwa ngaphandle, balahlelwe elizweni abangalaziyo na?

29 Wena lizwe, lizwe, lizwe, zwana ilizwi likaJehova!

30 UJehova uthi: “Bhalani umuntu lo njengongelabantwana, umuntu ongayikuphumelela empilweni yakhe, ngoba kakho owenzalo yakhe ozaphumelela, kakho ozahlala esihlalweni sobukhosi sikaDavida loba abuse futhi koJuda.”